” شعرة بيضا ” بقلم : علاء رستم

” شعرة بيضا ” بقلم : علاء رستم
كان لازم طلع جواز سفر فلازم اتصور صورة جديدة رحت لاستديو تصوير و قعدت بوضعية التمثال لحتى يطلعني شخصية كما قال المصور و صار يقلي جسمك ع الشمال نزل ايديك لتحت ..و راسك افتلو ع اليمين … لفوق شوي لتحت …لورااا (اتقول عم يصف سيارة)
شيييييز … شيزت … وضغط ع زر الكاميرا و طلع ضو مية فولط اتقولو رعد برق … طبعا انا غمضت … قلي خلينا انعيد … و رجع يصف راسي مرة تانية لفوق لتحت لورا نزل ايديك ….. شيييز … فلاااش … و ارجع غمض ….هيك لزبطت …
و عند استعراض الصورة صار يزبطها ع الفوتوشوب و يمحي و يشيل و يحط بطريقة تجارية و كأنو عم يدهن حيط وش بويا …. فقلتلو وقفففف شو عم اتساوي (كونترول آلت زد) …. خلي الصورة طبيعية … فقلي اي كل زبايني بزبطلن وشن برجعن وكالة … مثلا هاي حبة شباب شلتلك اياها … فقلتلو يا فهمان هاي شامة مو حبة شباب …. و طبع الصورة و قصها بالمقصلة الصغيرة لست صور….
و عدت الى المنزل و تفاجئت بأنو الصورة الطبيعية بتبين انو طالعي شعرة بيضا براسي و كانت الشعرة التي قسمت ظهر الصورة مبينة متل العين المقلوعة فزعلت لانو الشعرة البيضا هي بتكبر الواحد و لازم اتخلص منا .. قصها .. اقلعها من جزورها و اقبض عليها لانو هي حرامية بتسرق العمر و الزمن …
قلت لحالي : بس الشيبة هيبة … و الهيبة وقار … و والوقار إحترام ..و الإحترام محبة … و المحبة نعمة… و النعمة من الله فهاي أحلى هدية من الله ….
اي الشعرة البيضا طالعة بصورة جواز السفر .. يعني حتى الشعرة البيضا بدها اتسافر برا البلد …
فوقفت قدام المراية و قلت وبعدين شو بدي اعمل بهالشعرة المندسة ….. اطلعت بخلقتي نكشت شعري ..بس ما شفتها … !!!!
و ارجعت لمحل التصوير وقلتلوا لمصور الفوتوشوب شو القصة … ضحك … قلي اي بسيطة هاي و انا عم نضفلك سنانك ع الفوتوشوب بلون ابيض … كونو حضرتك سافق جاط تبولة و البقدونس عامل مظاهرة ع طبقة المينا … فبالغلط شخطت ع شعرك …
لا اتواخذنا رح اعملك صورة جديدة …
و رجع صفلي راسي من جديد …لفوق لتحت لوراااا شيييييييييييييييييييييز 

علاء رستم

مقالات ذات صله

Powered by themekiller.com anime4online.com animextoon.com apk4phone.com tengag.com moviekillers.com