“كوكب الزهرة “.. كتابة: د.حسام وتار

“كوكب الزهرة “.. كتابة: د.حسام وتار

صباحا” , سيارات في الشوارع تقودها نساء , و صبايا في طريقهن الى الجامعة و حتى التكاسي تقودها نساء , كل هذا أثار فضولي لأعرف ماهي القصة !!!
ركنت السيارة جانبا” , و ترجّلت منها ( ترجّلت كلمة جديدة أول مرة بستعملها ) , و قلت في نفسي : خلّيني امشي شوي منه بعمل رياضة و بنزّل مستوى الكوليسترول و منه بعرف شو قصة النسوان اللي مليانة في الشوارع و الطرقات ….

و أنا عم أتمشى , كل النسوان عم تطلع علي و كأني قطعة شوكولا , حسيت حالي مطربان نوتيلا .. و عم اسمع وشوشات بين بعضهن : واو شب … ياي شب ..وحدة مسكت الموبايل و قالت الو .. الو ..وينك كلبة ؟ تعي بسرعة في شب عم يمشي …
انا قلت لحالي : صعي , و ين الشباب ؟؟ وين اختفوا ؟؟

ازداد الضعط الأنوثي و طلعت بخلقتي وحدة طويلة ضخمة و قالت : يمووووووو ع الله , ولك مالك خايف ع حالك ؟…بصراحة خفت و بعدها أشّرت الى سيرفيس ميكرو , وقف الميكرو و طلعت فيه …

مشي الميكرو و أخذت نفس عميق و غمضت عيوني و بعدها فتحت عيوني و شفت هديك الشوفة :
أغنية ابو وديع لآخر عيار (الفرقة صعبة كتير يابا … مش قادر أصبر ع غيابك .. كل ليلة بجمّع دموعي .. و بسهر مع دمعات شموعي ( لأنه مافي كهرباء ) .. أنا أنا و الحب و عذابك !!!)

و الميكرو كله نسوان عم يبكوا و يشوحو و ينوحو ع الاغنية …طلّعت و اذ لاقيت شوفيرة !!!.. نعم شوفيرة عم تسوق و تطحش و منسجمة مع الغنية و كل شوي عم تقول ( أنا أنا و الحب و عذابك ..وليك معاونة وزعي محارم للراكبات ..عم اسمع صوت مخاط …

و انا في قمة الصدمة … شفت مكتوب ع البلور :
لا تشوف سوسو عم تتدّرج ………….دوبلها و اتفرّج …
عين الحسود فيها عودة … و لك اشتقتلك يا حمّودة …

و عملت تطليعة سريعة بالميكرو … كله نسوان مافي ولا رجال .. و النسوان من كتر البكي ماشافوني لسه ..عطيت المعاونة 25 ليرة سورية .. أخذت المصاري و هي عم تبكي و حنفية أنفها عم تنقط تنقيط .. مسكت ايدي و فتحت عيونها و جعرت هديك الجعرة :

ولك شب … يا بنات شب … ياي .. شعر بايده .. دقن ..ولك شب ..
البنات فتحوا عيونهن والميكرو وقف بأرضه و صار هدوء مريب بالميكرو … حسيت حالي كائن فضائي جاية من كوكب فيكا تبع دايسكي ..

قالت الشوفيرة : لا و النبي ما بتدفع … بس بشرط رح نتصوّر معك سيلفي .. عطوني عصاية السيلفي يا بنات …و عمّت الفرجة أرجاء الميكرو ..
قالتلي وحدة : شو اسمك ولا؟
قلتلها : ابو بكري ..
قالت : يا بنات … كلنا مع بعض رح نقول أبو بكرررررررري
ووقفت بالنص .. و قلنا : ابووووو بكرررري …
و تصوّرنا ….

نزلت من الميكرو .. شفت بياعات خضرة و بياعات فواكة و البسطات كلها نسوان …
مافي ولاشب و لا رجال و لا عجوز و لا حتى كهل ( كمان هي كلمة جديدة ) …

و أخيرا شفت شب عم يركض … لحقته و قلتله : ولك اش في ؟
قال لي : دو ..دو … دورية براس الحارة ..اهرب بسرعة

د.حسام وتار ( ابو بكري )

 

مقالات ذات صله

Powered by themekiller.com anime4online.com animextoon.com apk4phone.com tengag.com moviekillers.com